سنــاء يــمــانـي
هذي قصيدتي بلدية
نظمتها بالألوان
والروح مغربية
نغمة وألحان
إبداعات موسيقية
أرض معروفة
بتقاليد وعادات
تراث بلدي كلو نغمات
وزغاريت في لجبال
أصواتو تنادي
فن أصيل
عندو شلا سميات
خوذ لقليل
في أرض الخير
صول ودور وجول
مناطق وجيهات
طبق مشكل
قدامو لعين تحير
مشموم وريدات
وهكذا تغرسو الجذور
دكالة يا دكالة
لعرس ناشط والركزة ݣبالة
الجماعة زينة
والناس حاضرة
بالهمة والشان
وأزمور رمز الأصالة
عامر بكل ما هو فتان
فن وعيطة
في عبدة تسلب الفنان
وجدة نغمة ورݣادة
رقصة النخوة
من لكتاف تبان
وبأرض الصحرا
الكدْرة
أصالة مغربية
وأݣادير
طابع الفن الأمازيغي
أحواش رقصة تتكلم
كلها دلالات وتعابير
والفاهم يفهم ويتعلم
الدقة مراكشية
الفن والبهجة هي
هوارة بالصيحة تعجب
تفاجي هوالي
وتداوي حالي
نسمعها نبرد
وعند هل فاس
التاويل والنغمة غزالة
كلشي بالقياس
والشمال
عيطة جبلية وعيوع
آآآش خلا فيا
نسرح في جبال عالية
بلادي فنها خاتر
غالي مالو مثيل
من ملحون وعيوط
أغاني شعبية
تسمعها تميل
تقول أنا مغربية
روح وهوية
لخير كثير
مع النغمة تخلي العين تحير
في لݣلسة والسهرة
نختمها ونبصم بالعشرة
ما حلاك يا فن بلادي
الله يخليك ديما بخير
